ગુજરાતમાં દારૂબંધી છે, ગુજરાતમાં દારૂનું ઉત્પાદન, વેચાણ અને સેવન પ્રતિબંધિત છે, પરંતુ સરકારે 2023 માં GIFT સિટીમાં દારૂની છૂટ આપી છે. ત્યારે ગુજરાત સરકારે GIFT સિટી (ગુજરાત ઇન્ટરનેશનલ ફાઇનાન્સ ટેક-સિટી) માં દારૂના વેચાણથી 94.19 લાખ રૂપિયાની આવક મેળવી છે. રાજ્યમાં દારૂબંધી અમલમાં હોવા છતાં, 30 ડિસેમ્બર, 2023 થી GIFT સિટીમાં દારૂ પીવાની મંજૂરી આપવામાં આવી છે. મુખ્યમંત્રી ભૂપેન્દ્ર પટેલે સોમવારે ગુજરાત વિધાનસભામાં માહિતી આપી હતી કે 31 જાન્યુઆરી, 2025 સુધીમાં ગિફ્ટ સિટીમાં 3,324 બલ્ક લિટર સ્પિરિટ, 470 બલ્ક લિટર વાઇન, 19,915 બલ્ક લિટર બિયરનું વેચાણ થયું છે.
સરકારના જણાવ્યા અનુસાર, ગિફ્ટ સિટીમાં દારૂ વેચવા માટે બે કંપનીઓને લાઇસન્સ આપવામાં આવ્યું છે. વેસ્ટ ઇન્ડિયા રિક્રિએશન પ્રોજેક્ટ્સ પ્રાઇવેટ લિમિટેડ – 9 જાન્યુઆરી, 2024 અને ધ ગ્રાન્ડ મર્ક્યુરી – 10 જાન્યુઆરી, 2024
ગુજરાતમાં 1960 થી દારૂબંધી અમલમાં છે, પરંતુ સરકારે GIFT સિટીને વૈશ્વિક વ્યાપાર ઇકોસિસ્ટમ તરીકે વિકસાવવા માટે દારૂ પરનો પ્રતિબંધ હટાવી લીધો. આ પાછળના મુખ્ય કારણો વિદેશી રોકાણકારો અને ટેકનોલોજી નિષ્ણાતોને આકર્ષવા અને રાષ્ટ્રીય અને આંતરરાષ્ટ્રીય કંપનીઓને સુવિધાઓ પૂરી પાડવાના છે.
શું છે નવા નિયમો?
- ગિફ્ટ સિટીમાં હોટલ, રેસ્ટોરન્ટ અને ક્લબને ‘વાઇન એન્ડ ડાઇન’ સુવિધાઓ માટે લાઇસન્સ મળશે.
- દારૂની બોટલોના છૂટક વેચાણ પર પ્રતિબંધ રહેશે.
- GIFT સિટીમાં કર્મચારીઓ અને કંપની માલિકોને દારૂ પરમિટ મળશે.
- ગુજરાત આવતા બહારના લોકોને પણ કામચલાઉ પરમિટ પર દારૂ ખરીદવાની મંજૂરી આપવામાં આવશે.
GIFT સિટીમાં દારૂના વેચાણ અંગે સરકારની આ નીતિને રોકાણકારોને આકર્ષવાની દિશામાં એક મોટું પગલું માનવામાં આવી રહ્યું છે.
