2025 પૂરું થવા આવ્યું છે. આ વર્ષે ટ્રમ્પ અને ઝેલેન્સ્કી વ્હાઇટ હાઉસમાં મીડિયા સામે લડ્યા. કેનેડાના પીએમ જસ્ટિન ટ્રુડો રાજીનામું આપીને પોતાની ખુરશી પણ સાથે લઈ ગયા. ઓસ્કાર જીતતા જ અભિનેતાએ મોઢામાંથી ચ્યુંઈંગ ગમ કાઢીને ગર્લફ્રેન્ડ તરફ ફેંકી. અફઘાનિસ્તાને પાકિસ્તાની સૈનિકોની પેન્ટ લહેરાવી અને Gen-Zએ નેપાળની સરકાર પાડી દીધી.
આ વર્ષે જે પણ થયું… કંઈક સારું, કંઈક ખરાબ, કંઈક જોયેલું, કંઈક અણજોયું; યાદ કરવા માટે આ 25 તસવીરો પર નજર કરી લો…
1. ટ્રમ્પ અને મસ્કની 2.6 હજાર કરોડની મિત્રતા
19 જાન્યુઆરી 2025 વોશિંગ્ટન ડીસી, અમેરિકા
અમેરિકી રાષ્ટ્રપતિ ડોનાલ્ડ ટ્રમ્પના શપથ ગ્રહણના એક દિવસ પહેલા વિક્ટરી રેલીમાં ટેસ્લાના CEO ઇલોન મસ્ક નાચતા જોવા મળ્યા હતા. મસ્કે ચૂંટણી પ્રચારમાં લગભગ 2.6 હજાર કરોડ રૂપિયા ખર્ચ્યા હતા. જીત બાદ ટ્રમ્પે તેમને સરકારી ખર્ચ ઘટાડવા માટે ‘DOGE’ના પ્રમુખ બનાવ્યા. મસ્કે 56,000 કર્મચારીઓની છટણી કરીને 15 લાખ કરોડ રૂપિયા બચાવવાનો દાવો કર્યો હતો. જોકે, તેમની અને ટ્રમ્પની મિત્રતા માત્ર 4 મહિના જ રહી. મે મહિનામાં મસ્કે રાજીનામું આપી દીધું.
2. ‘મિસ્ટર પ્રાઇમ મિનિસ્ટર, યુ આર ગ્રેટ’
13 ફેબ્રુઆરી 2025 વોશિંગ્ટન ડીસી, અમેરિકા
અમેરિકાના પ્રવાસે ગયેલા પીએમ મોદીને રાષ્ટ્રપતિ ટ્રમ્પે ‘અવર જર્ની ટુગેધર’ પુસ્તક ભેટમાં આપ્યું, જેમાં લખ્યું હતું- ‘મિસ્ટર પ્રાઇમ મિનિસ્ટર, યુ આર ગ્રેટ.’ ટ્રમ્પે ભારતને F-35 જેટ ઓફર કર્યા અને 26/11ના આતંકી તહવ્વુર રાણાને સોંપવાની જાહેરાત કરી. મીટિંગના બે કલાક પહેલા ટ્રમ્પે રેસિપ્રોકલ ટેરિફ (પરસ્પર ટેરિફ)ની જાહેરાત કરતા કહ્યું કે ભારતમાં સામાન વેચવા પર ઘણો વધારે ટેક્સ લાગે છે. આ વાતચીતમાં ભારત-અમેરિકા વચ્ચે કોઈ સમજૂતી ન થઈ શકી જે અત્યાર સુધી અટકેલી છે.
3. અમેરિકાએ 5 લાખ પ્રવાસીઓને દેશનિકાલ કર્યા
15 ફેબ્રુઆરી 2025 પનામા સિટી, પનામા
સત્તામાં આવતાની સાથે જ ડોનાલ્ડ ટ્રમ્પે પ્રથમ વર્ષમાં 6 લાખ ગેરકાયદેસર પ્રવાસીઓને પાછા મોકલવાનો લક્ષ્યાંક રાખ્યો હતો. જેમને તેમના દેશ ન મોકલી શકાયા, તેમને પનામા મોકલવામાં આવ્યા. ત્યાં એક ઈરાની મહિલાએ હોટલમાં લિપસ્ટિકથી ‘હેલ્પ અસ’ લખ્યું હતું. સરકારી આંકડા મુજબ અત્યાર સુધીમાં 5.27 લાખ પ્રવાસીઓને બહાર કાઢવામાં આવ્યા છે, જેમાં 3,258 ભારતીયો છે. 16 લાખથી વધુ લોકો પોતે જ અમેરિકા છોડી ચૂક્યા છે.
4. વર્લ્ડ વોરનો જુગાર રમી રહ્યા છો: ટ્રમ્પ
28 ફેબ્રુઆરી 2025 વોશિંગ્ટન ડીસી, અમેરિકા
વ્હાઇટ હાઉસમાં યુક્રેનિયન રાષ્ટ્રપતિ વોલોદિમીર ઝેલેન્સ્કી અને અમેરિકી રાષ્ટ્રપતિ ડોનાલ્ડ ટ્રમ્પ વચ્ચે મિનરલ ડીલની વાતચીત તીખી ચર્ચામાં ફેરવાઈ ગઈ. ટ્રમ્પે ઝેલેન્સ્કીને કહ્યું કે તેઓ ત્રીજું વિશ્વ યુદ્ધ કરાવવાનો જુગાર રમી રહ્યા છે. ઝેલેન્સ્કી કોઈ સમજૂતી વગર જ પરત ફર્યા. 2 મહિના પછી સમજૂતી માટે તેઓ ફરી અમેરિકા ગયા. ખનિજોના બદલામાં ટ્રમ્પે યુક્રેનને રશિયા સામે જંગ લડવા માટે 350 બિલિયન ડોલર એટલે કે લગભગ 31 લાખ કરોડ રૂપિયા આપ્યા.
5. ગાઝાની ઇફ્તાર
1 માર્ચ 2025 ગાઝા સિટી, પેલેસ્ટાઈન
ગાઝામાં યુદ્ધનું આ ત્રીજું વર્ષ ચાલી રહ્યું છે. તબાહી વચ્ચે લોકોએ ઇફ્તાર કરી. WHOના જણાવ્યા અનુસાર, ગાઝામાં 5 લાખથી વધુ લોકો ભૂખમરાનો સામનો કરી રહ્યા છે. જુલાઈ સુધીમાં 12 હજારથી વધુ બાળકો કુપોષિત થઈ ચૂક્યા હતા. આગામી રમઝાન સુધીમાં 43,000થી વધુ બાળકો પર ભૂખને કારણે મોતનું જોખમ તોળાઈ રહ્યું છે.
6. ઓસ્કાર જીતવા પર ગર્લફ્રેન્ડ પર ચ્યુંઈંગ ગમ ફેંકી
2 માર્ચ 2025 લોસ એન્જલસ, અમેરિકા
97માં ઓસ્કાર એવોર્ડમાં અમેરિકી અભિનેતા એડ્રિયન બ્રોડીને ફિલ્મ ‘ધ બ્રુટલિસ્ટ’ માટે શ્રેષ્ઠ અભિનેતાનો એવોર્ડ મળ્યો. મંચ પર જતાં પહેલાં તેમણે મોઢામાંથી ચ્યુંઈંગ ગમ કાઢીને ગર્લફ્રેન્ડ જ્યોર્જિના ચેપમેન તરફ ફેંકી, જેથી બોલવામાં તકલીફ ન પડે. આ પહેલા બ્રોડી 2003માં આ એવોર્ડ જીતનાર સૌથી યુવા અભિનેતા (29 વર્ષ) બન્યા હતા. તેઓ બે વાર ઓસ્કાર માટે નોમિનેટ થયા અને બંને વખત જીત્યા.
7. પીએમ પદ છોડવા પર જીભ બતાવી
10 માર્ચ 2025 ઓટ્ટાવા, કેનેડા
માર્ક કાર્ની કેનેડાના નવા પીએમ તરીકે ચૂંટાયા બાદ પૂર્વ પીએમ જસ્ટિન ટ્રુડો પોતાની ખુરશી ઉઠાવીને, જીભ બતાવતા સંસદમાંથી બહાર નીકળ્યા હતા. ટ્રુડો 2015થી કેનેડાના પીએમ હતા. 2025ની ચૂંટણી પહેલા લેબર પાર્ટીની અંદર ટ્રુડો વિરુદ્ધ અવાજ તેજ થયો હતો. તેમણે 6 જાન્યુઆરીએ ચૂંટણી પહેલા જ રાજીનામાની જાહેરાત કરી દીધી હતી.
8. પાકિસ્તાનમાં ટ્રેન હાઇજેક
11 માર્ચ 2025 ક્વેટા, પાકિસ્તાન
ક્વેટાથી પેશાવર જઈ રહેલી જાફર એક્સપ્રેસ પર બલોચ લિબરેશન આર્મી (BLA)એ હુમલો કરીને હાઇજેક કરી લીધી. પાકિસ્તાન સરકારે બીજા દિવસે 33 લડવૈયાઓને મારીને બંધકોને છોડાવવાનો દાવો કર્યો હતો. આમાં 28 સૈનિકો માર્યા ગયા હતા. જ્યારે BLAએ 100થી વધુ બંધકોની હત્યાનો દાવો કર્યો હતો. ગ્લોબલ ટેરરિઝમ ઇન્ડેક્સ મુજબ 2025માં BLAના હુમલા 60% વધ્યા છે. આ સંગઠન પાકિસ્તાનથી અલગ દેશ ઈચ્છે છે.
9. 9 મહિના પછી પૃથ્વી પર પગ મૂક્યો
18 માર્ચ 2025 ફ્લોરિડા, અમેરિકા
9 મહિના 14 દિવસ અંતરિક્ષ સ્ટેશન પર ફસાયેલા રહ્યા બાદ એસ્ટ્રોનોટ સુનિતા વિલિયમ્સ અને બુચ વિલ્મોર પરત ફર્યા. પૃથ્વી પર પહોંચતા જ તેમણે કહ્યું- ‘હેલો પૃથ્વીવાસીઓ, અમે પાછા આવી ગયા છીએ.’ સુનિતા 5 જૂન 2024ના રોજ NASAના 8 દિવસના જોઈન્ટ ક્રૂ ફ્લાઇટ ટેસ્ટ મિશન પર ગયા હતા. તેમને લઈ જનારા સ્ટારલાઈનર સ્પેસક્રાફ્ટમાં ટેકનિકલ ખામી આવતા સુનિતા ત્યાં જ ફસાઈ ગયા હતા. સ્પેસ Xના ડ્રેગન સ્પેસક્રાફ્ટ દ્વારા તેમની વાપસી થઈ.
10. 49% સુધી રેસિપ્રોકલ ટેરિફ
2 એપ્રિલ 2025 વોશિંગ્ટન ડીસી, અમેરિકા
અમેરિકી રાષ્ટ્રપતિ ડોનાલ્ડ ટ્રમ્પે વિશ્વના મોટાભાગના દેશો પર રેસિપ્રોકલ ટેરિફની જાહેરાત કરી. જેમાં ભારત પર 26% ટેરિફ લાદવામાં આવ્યો. ટ્રમ્પે તેને લિબરેશન ડે નામ આપ્યું. 7 દિવસ પછી જ તેમણે તેને 90 દિવસ માટે સ્થગિત કરી દીધો. આ પછી રશિયા પાસેથી વધુ તેલ લેવાના કારણે ટ્રમ્પે ભારત પર લાગતો ટેરિફ 50% કરી દીધો.
11. ભૂકંપ પછી તૂટી પડેલી બુદ્ધ પ્રતિમા
3 એપ્રિલ 2025 માંડલે, મ્યાનમાર
મ્યાનમારમાં 28 માર્ચે 7.7ની તીવ્રતાનો ભૂકંપ આવ્યો હતો. આગામી 15 દિવસ સુધી ભૂકંપના હળવા આંચકા અનુભવાતા રહ્યા. અકસ્માતમાં 3,600થી વધુ લોકોએ જીવ ગુમાવ્યા અને 5 હજારથી વધુ ઘાયલ થયા. હકીકતમાં, મ્યાનમારમાં પૃથ્વીની સપાટી નીચે 1,200 કિમી લાંબી તિરાડ છે, જેને સાગાઈંગ ફોલ્ટ કહેવામાં આવે છે. તેના ખડકો ઉપર-નીચે થવાને બદલે આજુબાજુ ખસે છે, જેના કારણે મ્યાનમારમાં વારંવાર ભૂકંપ આવે છે.
12. પ્રથમ બિન-યુરોપિયન પોપની અંતિમવિધિ
23 એપ્રિલ, 2025 સેન્ટ પીટર્સ સ્ક્વેર, વેટિકન સિટી
કેથોલિક ખ્રિસ્તી ધર્મગુરુ પોપ ફ્રાન્સિસનું 88 વર્ષની વયે નિધન થયું. 7 દિવસ સુધી મૃતદેહને દર્શન માટે રાખવામાં આવ્યો હતો. પોપ ફ્રાન્સિસ 1300 વર્ષમાં પ્રથમ બિન-યુરોપિયન પોપ હતા. 16મીથી 19મી સદી સુધી પોપના નિધન પછી તેમનું હૃદય કાઢીને સુરક્ષિત રાખવામાં આવતું હતું. પોપ ફ્રાન્સિસે આવું કરવાની મનાઈ કરી દીધી હતી.
13. 2 દિવસમાં 722 લોકો એવરેસ્ટ પહોંચ્યા
18 મે 2025 માઉન્ટ એવરેસ્ટ, નેપાળ
આ વર્ષે માઉન્ટ એવરેસ્ટ પર 850થી વધુ લોકોએ ચડાઈ કરી. તેમાંથી 722 લોકો તો માત્ર 18 અને 19 મેના રોજ પહોંચ્યા હતા. ન્યૂયોર્કના એન્ડ્રુ ઉશાકોવ 3 દિવસ અને 23 કલાકમાં ટોચ પર પહોંચીને સૌથી ઝડપી એવરેસ્ટ સર કરનાર વ્યક્તિ બન્યા. માઉન્ટ એવરેસ્ટ ચઢનારાઓની સતત વધતી સંખ્યા જોઈને ગયા વર્ષે જ નેપાળની સુપ્રીમ કોર્ટે પરમિટ લાયસન્સ આપવાની સંખ્યા નક્કી કરવા કહ્યું હતું.
14. ઈરાનમાં જમીનથી 200 ફૂટ નીચે અમેરિકી સ્ટ્રાઈક
21 જૂન 2025 તેહરાન, ઈરાન
અમેરિકાએ ઈરાનના 3 પરમાણુ ઠેકાણા- ફોર્ડો, નતાન્ઝ અને ઈસ્ફહાન પર 7 B-2 બોમ્બરથી એરસ્ટ્રાઈક કરી. જમીનથી 200 ફૂટ નીચે સુધી પ્રહાર કરવાની ક્ષમતાને કારણે તેને ‘બંકર બસ્ટર’ પણ કહેવામાં આવે છે. 1979ની ઈસ્લામિક ક્રાંતિ પછી ઈરાનમાં અમેરિકાનો વિરોધ વધવા લાગ્યો. ઈરાની વિદ્યાર્થીઓએ અમેરિકી દૂતાવાસ પર હુમલો કરીને 52 અમેરિકી નાગરિકોને 444 દિવસ સુધી બંધક બનાવી રાખ્યા હતા. અહીંથી જ અમેરિકા-ઈરાનની દુશ્મની શરૂ થઈ.
15. કોલ્ડપ્લે કોન્સર્ટમાં ચીટિંગ કરતા પકડાયા એસ્ટ્રોનોમર CEO
16 જુલાઈ 2025 મેસેચ્યુસેટ્સ, અમેરિકા
ટેક કંપની એસ્ટ્રોનોમરના CEO એન્ડી બાયરન અને કંપનીની HR મેનેજર ક્રિસ્ટિન કેબોટનો અફેર કોલ્ડપ્લે કોન્સર્ટમાં સામે આવ્યો. બંને એકબીજાને ભેટી રહ્યા હતા અને કિસ કરી રહ્યા હતા. જેવો જ કેમેરો તેમના પર આવ્યો, બંને ગભરાઈને દૂર થઈ ગયા. કંપનીએ આ બાબતથી પોતાને અલગ કરી બાયરનને રજા પર મોકલી દીધા. બાદમાં બાયરન અને કેબોટ બંનેએ રાજીનામું આપી દીધું. કેબોટના પતિ તેમનાથી અલગ થઈ ગયા અને હવે તેમને કોઈ નોકરી મળી રહી નથી.
16. અલાસ્કા ફેસ-ઓફ: ટ્રમ્પ-પુતિન
15 ઓગસ્ટ 2025 અલાસ્કા, અમેરિકા
રશિયા-યુક્રેન યુદ્ધ પર વાત કરવા અમેરિકી રાષ્ટ્રપતિ ડોનાલ્ડ ટ્રમ્પ અને રશિયન રાષ્ટ્રપતિ પુતિન અલાસ્કામાં મળ્યા હતા. આ એ જ રાજ્ય છે જેને 158 વર્ષ પહેલા રશિયાએ જ અમેરિકાને 45 કરોડ રૂપિયામાં વેચ્યું હતું. બંને નેતાઓ વચ્ચે 3 કલાક વાતચીત થઈ પરંતુ કોઈ સમજૂતી પર હસ્તાક્ષર થઈ શક્યા નહીં. આ પહેલા ટ્રમ્પ 4 વખત પુતિન સાથે ફોન પર વાત કરી ચૂક્યા હતા.
17. અફઘાનિસ્તાનમાં ભૂકંપે 1400 જીવ લીધા
31 ઓગસ્ટ 2025 રિચમંડ હિલ, અફઘાનિસ્તાન
અફઘાનિસ્તાનના જલાલાબાદમાં રાત્રે 11:47 વાગ્યે 6ની તીવ્રતાનો ભૂકંપ આવ્યો. બે દિવસ પછી દક્ષિણ-પૂર્વી ભાગમાં 5.5ની તીવ્રતાના આંચકા અનુભવાયા. આમાં 1400થી વધુ લોકોના મોત થયા અને 3200થી વધુ ઘાયલ થયા. તેના આંચકા પાકિસ્તાનના ખૈબર પખ્તુનખ્વા, પંજાબ પ્રાંત અને ભારતના ગુરુગ્રામ સુધી અનુભવાયા હતા.
18. વિશ્વની 37% વસતીના આ ત્રણ નેતા
1 સપ્ટેમ્બર 2025 થિયન્ચીન, ચીન
SCOના મંચ પર ભારતીય પીએમ નરેન્દ્ર મોદી, રશિયન રાષ્ટ્રપતિ પુતિન અને ચીની રાષ્ટ્રપતિ શી જિનપિંગ એકસાથે વાતચીત કરતા જોવા મળ્યા હતા. ભારત પર 50% ટેરિફ લાદ્યા પછી અમેરિકા અને ટ્રમ્પ માટે આ એક સંદેશ હતો. આ ત્રણેય દેશોમાં વિશ્વની 37% વસતી રહે છે, જે અમેરિકા કરતા 9 ગણી છે. તેમની GDP પણ વિશ્વની 32% છે. ત્રણેય દેશો મળીને અમેરિકા કરતા દોઢ ગણો વધુ વેપાર કરે છે.
19. Gen-Zએ 4 વર્ષમાં ત્રીજી સરકાર બદલી
8-11 સપ્ટેમ્બર 2025 કાઠમંડુ, નેપાળ
નેપાળમાં ફેસબુક, ઇન્સ્ટાગ્રામ સહિત અનેક સોશિયલ મીડિયા પ્લેટફોર્મ પર પ્રતિબંધ અને ભ્રષ્ટાચારના વિરોધમાં Gen-Z એ પ્રદર્શન કર્યું. પીએમ કે. પી. શર્મા ઓલીએ રાજીનામું આપીને ભાગવું પડ્યું. પૂર્વ પીએમ શેર બહાદુર દેઉબાને લોકોએ દોડાવી દોડાવીને માર્યા. યુવાનોએ સોશિયલ પ્લેટફોર્મ ડિસ્કોર્ડ પર વોટિંગ કરીને સુશીલા કાર્કીને નવા પીએમ તરીકે પસંદ કર્યા. આ પહેલા Gen-Z આંદોલનથી બાંગ્લાદેશ અને શ્રીલંકામાં પણ તખ્તાપલટ થયો હતો.
20. પાક સૈનિકોની પેન્ટ લહેરાવી જીતની ઉજવણી કરતા અફઘાનીઓ
15 ઓક્ટોબર 2025 નંગરહાર, અફઘાનિસ્તાન
8 ઓક્ટોબરે ખૈબર પખ્તુનખ્વામાં પાકિસ્તાની તાલિબાનના હુમલામાં 23 પાકિસ્તાની સૈનિકો માર્યા ગયા હતા. આ પછી 8 દિવસ સુધી બંને દેશો વચ્ચે સંઘર્ષ ચાલ્યો, જેમાં લગભગ 250 લોકોના મોત થયા. 48 કલાકના સીઝફાયર પહેલા તાલિબાની લડવૈયાઓ પાકિસ્તાની ચોકીઓ પરથી સૈનિકોની પેન્ટ અને હથિયારો લઈ ગયા અને નંગરહારના ચોક પર લહેરાવીને જશ્ન મનાવ્યો. સરહદ પર હજુ પણ બંને દેશો વચ્ચે તણાવ યથાવત છે.
21. મક્કા ગયેલા 45 ભારતીયો બળીને ખાખ
17 સપ્ટેમ્બર 2025 મક્કા, સાઉદી અરેબિયા
ઉમરાહ કરી રહેલા ભારતીય શ્રદ્ધાળુઓની બસ મક્કાથી મદીના જતા સમયે ડીઝલ ટેન્કર સાથે અથડાઈ હતી. આમાં સવાર 46માંથી 45 લોકોના બળી જવાથી મોત થયા હતા. મૃતકોમાં 18 સભ્યો એક જ પરિવારના હતા. ઉમરાહ મક્કાની એ ધાર્મિક યાત્રા છે જે વર્ષમાં ગમે ત્યારે કરી શકાય છે, જ્યારે હજ ઇસ્લામી કેલેન્ડરના ઝિલહિજ્જા મહિનાની 8થી 12 તારીખ વચ્ચે થાય છે.
22. દુબઈ એરશોમાં તેજસ ક્રેશ
21 નવેમ્બર 2025 દુબઈ, UAE
દુબઈ એર શોમાં ભારતીય વાયુસેનાનું તેજસ ફાઈટર જેટ ક્રેશ થઈ ગયું. પાયલટ નમાંશ સ્યાલનું પણ મોત થયું હતું. તેજસ ભારતનું પ્રથમ સ્વદેશી વિમાન છે. તે એક વારમાં 3,000 કિમીની ઉડાન ભરી શકે છે અને એક સાથે 10 ટાર્ગેટ સાધી શકે છે. આ પહેલા 2024માં રાજસ્થાનના પોકરણમાં યુદ્ધાભ્યાસ દરમિયાન એન્જિન ફેલ થવાને કારણે તેજસ ક્રેશ થયું હતું.
23. હોંગકોંગમાં 77 વર્ષની સૌથી મોટી આગ
26 નવેમ્બર 2025 તાઈ પો, હોંગકોંગ
32 માળના એક રહેણાંક કોમ્પ્લેક્સમાં સમારકામ માટે લગાવવામાં આવેલા વાંસમાં આગ લાગી ગઈ. એક પછી એક 8 ઈમારતોમાં આ આગ ફેલાઈ ગઈ. અકસ્માતમાં 161 લોકોના મોત થયા અને લગભગ 123 ઘાયલ થયા. 24 કલાક પછી પણ માત્ર 5 ઈમારતોની આગ કાબુમાં આવી હતી. 77 વર્ષ પહેલા 1948માં હોંગકોંગના એક ગોદામમાં આગ લાગી હતી, જેમાં 176 લોકોના મોત થયા હતા.
24. આતંકી પાસેથી બંદૂક છીનવનાર ‘હીરો’
14 ડિસેમ્બર 2025 સિડની, ઓસ્ટ્રેલિયા
બોન્ડી બીચ પર હનુક્કા ફેસ્ટિવલ મનાવી રહેલા યહૂદીઓ પર 2 આતંકીઓએ ગોળીબાર કર્યો. તેમને રોકવા માટે 50 વર્ષના અહમદ-અલ-અહમદે એક આતંકી પર પાછળથી હુમલો કરી તેની બંદૂક છીનવી લીધી. અહમદની બહાદુરી માટે સૌ તેને હીરો કહી રહ્યા છે. આ હુમલામાં 14 લોકોએ જીવ ગુમાવ્યા. માર્યો ગયેલ આતંકી સાજિદ ભારતીય મૂળનો હતો, જ્યારે તેનો પુત્ર નવીદ ઓસ્ટ્રેલિયન નાગરિક છે જે હાલમાં પોલીસ કસ્ટડીમાં છે. આતંકીઓની ગાડીમાંથી ISISના ઝંડા મળી આવ્યા હતા.
25. હિંસા વચ્ચે પોતાનું ભવિષ્ય બચાવતી બાળકી
19 ડિસેમ્બર 2025 ઢાકા, બાંગ્લાદેશ
બાંગ્લાદેશના ભારત-વિરોધી નેતા ઉસ્માન હાદીની 12 ડિસેમ્બરે હત્યા બાદ દેશમાં ફરી એકવાર હિંસા ફાટી નીકળી હતી. પ્રદર્શનકારીઓએ બાંગ્લાદેશના સૌથી મોટા અખબાર ડેઈલી સ્ટાર અને પ્રોથોમ આલોની ઓફિસો સળગાવી દીધી હતી. તેની પાસે જ એક બાળકી પુસ્તકો વેચતી હતી. આ દરમિયાન ભારત વિરોધી નારા પણ લાગ્યા. પ્રદર્શનકારીઓએ ભારત પર હાદીના હત્યારાઓને શરણ આપવાનો આરોપ લગાવ્યો. આનાથી બંને દેશો વચ્ચે તણાવ ફરી એકવાર વધી ગયો છે.
