મહાકુંભમાં હવે ફક્ત 8 દિવસ બાકી છે, પરંતુ ભક્તોની ભીડ ઓછી થઈ રહી નથી. 37 દિવસમાં 54 કરોડથી વધુ ભક્તોએ સ્નાન કર્યું છે. મંગળવારે સવારે પણ ભારે ભીડ છે. સંગમ તરફ જતા રસ્તાઓ પર લાંબો જામ છે. પોલીસ ડાયવર્ઝન માટે ટીન શેડ લગાવી રહી છે.
આજે સવારે 10 વાગ્યા સુધીમાં 53.24 લાખ ભક્તોએ સ્નાન કર્યું. અભિનેત્રી જુહી ચાવલાએ પણ સંગમમાં સ્નાન કર્યું અને કહ્યું કે તે મારા જીવનની સૌથી શ્રેષ્ઠ સવાર હતી. કેન્દ્રીય મંત્રી પ્રહલાદ જોશી સંગમમાં ડૂબકી લગાવવા પહોંચ્યા. આજે પૂર્વ ઉપરાષ્ટ્રપતિ વેંકૈયા નાયડુ અને આંધ્રપ્રદેશના નાયબ મુખ્યમંત્રી અને અભિનેતા પવન કલ્યાણ સંગમમાં ડૂબકી લગાવશે.
સોમવારે રાત્રે, નૈની નયા બ્રિજ, ફાફામાઉ જેવા મહાકુંભને અડીને આવેલા વિસ્તારોમાં કારની 10-12 કિમી લાંબી કતાર લાગી ગઈ હતી. 8થી 10 કિમીની મુસાફરી કરવામાં લોકોને 3થી 4 કલાક લાગ્યા.
વહીવટીતંત્રનો અંદાજ હતો કે સપ્તાહના અંતે ભીડ ઓછી થશે. જોકે, સોમવારે જ એક કરોડથી વધુ ભક્તો સ્નાન માટે પહોંચ્યા હતા. શહેરમાં પ્રવેશતા પહેલા પોલીસ બહારથી આવતા વાહનોને રોકી રહી છે.
ત્યાંથી શટલ બસો અને ઈ-રિક્ષાઓ દોડી રહી છે, પરંતુ ભારે ભીડને કારણે ભક્તોને સંગમ પહોંચવા માટે 10-12 કિમી ચાલીને જવું પડે છે.
