આ વિરોધનું મુખ્ય કારણ UPI વ્યવહારો પર લાગુ થનારા નવા 0.4 ટકા Merchant Discount Rate (MDR) ને લઈને વેપારીઓમાં રહેલી નારાજગી છે. વેપારી સંગઠનોનું કહેવું છે કે ખાસ કરીને ₹2,000થી વધુના વ્યવહારોમાં વધારાનો ખર્ચ નાના અને મધ્યમ વેપારીઓના માર્જિન પર અસર કરી શકે છે.
આજે કેટલાક વેપારીઓ દ્વારા પોતાના UPI QR કોડ, પેમેન્ટ સાઉન્ડબોક્સ અને ડિજિટલ પેમેન્ટના અન્ય સંકેતોને કાળા કપડાથી ઢાંકીને વિરોધ દર્શાવવાની યોજના બનાવવામાં આવી છે. આ અભિયાનમાં ગ્રોસરી, FMCG, ઇલેક્ટ્રોનિક્સ, હાર્ડવેર, કપડાં, ઇલેક્ટ્રિકલ અને ઓટો પાર્ટ્સ જેવા વિવિધ ક્ષેત્રોના વેપારીઓ જોડાવાની વાત કરવામાં આવી છે.
મોબાઇલ અને ઇલેક્ટ્રોનિક્સ રિટેલર્સ માટે આ મુદ્દો ખાસ મહત્વનો બની શકે છે, કારણ કે આ ક્ષેત્રમાં ₹2,000થી વધુના UPI વ્યવહારો સામાન્ય છે. ગુજરાતના વેપારી સંગઠનોનું કહેવું છે કે ઘણા નાના વેપારીઓ માટે નફાનું માર્જિન પહેલેથી જ મર્યાદિત છે.
‘No UPI Day’ને સંપૂર્ણ ડિજિટલ પેમેન્ટ બંધ કરવાની કાયમી પહેલ તરીકે નહીં પરંતુ વેપારીઓની ચિંતાઓ સરકાર અને સંબંધિત સંસ્થાઓ સુધી પહોંચાડવાના એક દિવસના પ્રતિકાત્મક વિરોધ તરીકે રજૂ કરવામાં આવી રહ્યું છે.
ગુજરાતમાં UPIનો ઉપયોગ મોટા પાયે થાય છે ત્યારે આજનો દિવસ વેપારીઓ અને ગ્રાહકો બંને માટે રસપ્રદ રહેશે. દિવસ દરમિયાન કેટલા વેપારીઓ ખરેખર UPI સ્વીકારવાનું બંધ રાખે છે અને ગ્રાહકો તેની સામે કેવી પ્રતિક્રિયા આપે છે તેના પર પણ નજર રહેશે.
