ભારતીય ક્રિકેટ ચાહકો માટે ફરી એકવાર આંતરરાષ્ટ્રીય ક્રિકેટનો રોમાંચ પરત ફરવાનો છે. વેસ્ટ ઈન્ડિઝની ટીમ ભારતના પ્રવાસે આવી રહી છે, જ્યાં બંને ટીમો વચ્ચે કુલ 8 મેચની વ્હાઇટ-બોલ સિરીઝ રમાશે. આ પ્રવાસની શરૂઆત 27 સપ્ટેમ્બર 2026થી થશે અને અંતિમ મુકાબલો 17 ઓક્ટોબરે રમાશે. ભારતીય ક્રિકેટ કંટ્રોલ બોર્ડ (BCCI) દ્વારા પ્રવાસનું સંપૂર્ણ શેડ્યૂલ જાહેર કરવામાં આવ્યું છે.
પ્રથમ ODIથી થશે પ્રવાસની શરૂઆત
વેસ્ટ ઈન્ડિઝ સામેની સિરીઝમાં પ્રથમ તબક્કામાં ત્રણ ODI મેચ રમાશે. પ્રથમ ODI 27 સપ્ટેમ્બરે તિરુવનંતપુરમમાં રમાશે. ત્યારબાદ 30 સપ્ટેમ્બરે બીજી ODI ગુવાહાટી અને 3 ઓક્ટોબરે ત્રીજી ODI ન્યૂ ચંદીગઢમાં રમાશે. ત્રણેય ODI મેચ બપોરે 2 વાગ્યાથી શરૂ થશે.
ODI સિરીઝનું શેડ્યૂલ
– 27 સપ્ટેમ્બર: ભારત vs વેસ્ટ ઈન્ડિઝ, 1લી ODI, તિરુવનંતપુરમ
– 30 સપ્ટેમ્બર: ભારત vs વેસ્ટ ઈન્ડિઝ, 2જી ODI, ગુવાહાટી
– 3 ઓક્ટોબર: ભારત vs વેસ્ટ ઈન્ડિઝ, 3જી ODI, ન્યૂ ચંદીગઢ
ત્યારબાદ શરૂ થશે T20નો રોમાંચ
ODI સિરીઝ પૂર્ણ થયા બાદ બંને ટીમો વચ્ચે પાંચ મેચની T20I સિરીઝ રમાશે. T20 સિરીઝનો પ્રથમ મુકાબલો 6 ઓક્ટોબરે લખનઉમાં રમાશે. ત્યારબાદ રાંચી, ઈન્દોર, હૈદરાબાદ અને બેંગલુરુમાં બાકીની ચાર મેચ યોજાશે. તમામ T20I મેચ સાંજે 7 વાગ્યાથી શરૂ થશે.
T20I સિરીઝનું શેડ્યૂલ
– 6 ઓક્ટોબર: 1લી T20I, લખનઉ
– 9 ઓક્ટોબર: 2જી T20I, રાંચી
– 11 ઓક્ટોબર: 3જી T20I, ઈન્દોર
– 14 ઓક્ટોબર: 4થી T20I, હૈદરાબાદ
– 17 ઓક્ટોબર: 5મી T20I, બેંગલુરુ
ટીમ ઈન્ડિયાની ટીમ પણ જાહેર
વેસ્ટ ઈન્ડિઝ સામેની આ હોમ સિરીઝ માટે BCCIએ ભારતીય ટીમની જાહેરાત કરી દીધી છે. ODI ટીમની કમાન શુભમન ગિલને સોંપવામાં આવી છે, જ્યારે કેએલ રાહુલ વાઇસ-કેપ્ટન છે. ODI ટીમમાં રોહિત શર્મા, વિરાટ કોહલી, રુતુરાજ ગાયકવાડ, રવિન્દ્ર જાડેજા, કુલદીપ યાદવ અને મોહમ્મદ સિરાજ જેવા ખેલાડીઓનો સમાવેશ કરવામાં આવ્યો છે.
બીજી તરફ T20I ટીમની કેપ્ટનશિપ શ્રેયસ અય્યર કરશે અને તિલક વર્માને વાઇસ-કેપ્ટન બનાવવામાં આવ્યા છે. T20 ટીમમાં અભિષેક શર્મા, વૈભવ સૂર્યવંશી, ઈશાન કિશન, સંજુ સેમસન, શિવમ દુબે, અક્ષર પટેલ, કુલદીપ યાદવ અને અર્શદીપ સિંહ સહિતના ખેલાડીઓનો સમાવેશ થયો છે.
ક્રિકેટ ચાહકો માટે 21 દિવસનો એક્શન પેક પ્રવાસ
27 સપ્ટેમ્બરથી 17 ઓક્ટોબર સુધી ચાલનારા આ પ્રવાસમાં ભારત અને વેસ્ટ ઈન્ડિઝ વચ્ચે કુલ 3 ODI અને 5 T20I, એટલે કે આઠ આંતરરાષ્ટ્રીય મુકાબલા રમાશે. ODIમાં બંને ટીમો વન-ડે ફોર્મેટમાં પોતાની તાકાત અજમાવશે, જ્યારે T20I સિરીઝમાં ઝડપી ક્રિકેટનો રોમાંચ જોવા મળશે.
હવે ક્રિકેટ ચાહકોની નજર 27 સપ્ટેમ્બરે તિરુવનંતપુરમમાં રમાનારી પ્રથમ ODI પર છે. આ મેચ સાથે ભારતના 2026-27 આંતરરાષ્ટ્રીય હોમ સીઝનની શરૂઆત પણ થશે.
