ગયા બજેટમાં કેન્દ્ર સરકાર તરફથી અમુક મોટી જાહેરાતો થઈ હતી જેમાં એક સ્ટાન્ડર્ડ ડિડક્શનની લિમિટમાં વધારાની પણ વાત હતી. નવા ટેક્સ રિજિમ હેઠળ સ્ટાન્ડર્ડ ડિડક્શનની લિમિટ 50,000થી વધારીને 75,000 રૂપિયા કરવામાં આવી છે. આ વખતે મોંઘવારી આરબીઆઇએ સેટ કરેલા સ્તરને પાર કરી ગઈ છે અને અર્થવ્યવસ્થાનો વિકાસ પણ અટક્યો છે એવામાં કેન્દ્ર સરકાર સામાન્ય જનતાને ટેક્સમાં રાહત આપે તેવી આશા સેવાઈ રહી છે.
સરકાર સ્ટાન્ડર્ડ ડિડક્શનની લિમિટમાં ફરી એકવાર ફેરફાર કરી શકે છે. પાછલી વખતે નવી ટેક્સ વ્યવસ્થા હેઠળ તેની લિમિટમાં વધારો કરવામાં આવ્યો હતો. તો આ વખતે જૂની ટેક્સ વ્યવસ્થા હેઠળ સ્ટાન્ડર્ડ ડિડક્શનની લિમિટમાં વધારો થઈ શકે છે. હાલ પગારદાર વ્યક્તિ અને પેન્શનરને જૂની ટેસક સુવિધા હેઠળ 50,000 રૂપિયા અને નવી વ્યવસ્થા હેઠળ 75,000 રૂપિયા પર કાપનો લાભ મળે છે, એક્સપર્ટનું માનવું છે કે આ લિમિટ વધીને 1 લાખ રૂપિયા સુધી થઈ શકે છે.
સરકાર નવા કરવેરા શાસન હેઠળ આવકવેરા સ્લેબમાં વધુ ફેરફારો કરવાનું વિચારી શકે છે જેથી વધુ કરદાતાઓ તેને અપનાવવા માટે પ્રોત્સાહિત થાય. ખાસ કરીને, એવી અટકળો છે કે 20 લાખ રૂપિયાથી વધુ આવક ધરાવતા લોકો પર 30% કર દર લાદવામાં આવી શકે છે.
નવી કર વ્યવસ્થા હેઠળ કર સ્લેબ
- 0-3 લાખ : 0%
- 3-7 લાખ રૂપિયા: 5%
- 7-10 લાખ રૂપિયા: 10%
- 10-12 લાખ રૂપિયા: 15%
- 12-15 લાખ રૂપિયા: 20%
- 15 લાખથી વધુ: 30%
કલમ 80C કપાત મર્યાદામાં વધારો
એવી પણ ચર્ચા છે કે આ વખતે કલમ 80C હેઠળ કપાતની મર્યાદા પણ વધારી શકાય છે. હાલમાં, કલમ 80C હેઠળ કપાતની મહત્તમ મર્યાદા 1.5 લાખ રૂપિયા છે જોકે, ફુગાવા અને કરદાતાઓ પર વધતા નાણાકીય દબાણને કારણે એક્સપર્ટ સરકાર પાસે લિમિટ વધારાની માંગ કરી રહ્યા છે જે ઓછામાં ઓછી વાર્ષિક આવક 2 લાખ રૂપિયા સુધી વધી શકે છે.
